ആത്മീയ വിനോദസഞ്ചാരത്തിന് ഏറ്റവും വലിയ ഉണർവേകാൻ തിരുപ്പതി ക്ഷേത്രം. ഇവിടേക്ക് എത്തുന്ന സഞ്ചാരികൾക്ക് ഇനി സീപ്ലയിനിൽ പറന്നിറങ്ങാം. UDAN പ്രാദേശിക കണക്ടിവിറ്റി സ്കീമിൽ ഉൾപ്പെടുത്തിയാണ് സീപ്ലെയിൻ സർവീസ് തിരുപ്പതിയിൽ ലോഞ്ച് ചെയ്യുന്നത്. 2026 ആദ്യത്തോടെ ആയിരിക്കും സീപ്ലെയിൻ പ്രവർത്തനം ആരംഭിക്കുക. കല്യാണി അണക്കെട്ട് ആയിരിക്കും സീപ്ലെയിനിന് പറന്നിറങ്ങാനുള്ള സ്ഥലമാകുക.
ആന്ധ്രാപ്രദേശ് എയർപോർട്സ് ഡെവലപ്മെൻ്റ് കോർപറേഷൻ ലിമിറ്റഡിന്റെ പിന്തുണയോടെ ആയിരിക്കും സീപ്ലെയിൻ സർവീസ് നടപ്പാക്കുക. തീർഥാടന കേന്ദ്രങ്ങളെ കാര്യക്ഷമമായും വേഗത്തിലും ബന്ധിപ്പിക്കുക എന്നതാണ് ഈ സംരംഭത്തിന്റെ ലക്ഷ്യം. വിജയവാഡയ്ക്കും ശ്രീശൈലത്തിനും ഇടയിൽ ഇതിനകം തന്നെ ജയകരമായ പരീക്ഷണപറക്കൽ നടത്തിക്കഴിഞ്ഞു. ഇതിനു പിന്നാലെയാണ് തിരുപ്പതിയിലും സീപ്ലെയിൻ ആരംഭിക്കാനുള്ള നടപടികൾ കൂടുതൽ ഊർജസ്വലമായി മുന്നോട്ട് പോകുന്നത്.
വിശദമായ പദ്ധതി റിപ്പോർട്ട് തയ്യാറാക്കുന്നതിനായി ഫീഡ്ബാക്ക് ഹൈവേസിനെ ഇതിനകം നിയോഗിച്ചു കഴിഞ്ഞു.ലോകപ്രശസ്തമായ വെങ്കടേശ്വര ക്ഷേത്രം തിരുപ്പതിയിലാണ് സ്ഥിതി ചെയ്യുന്നത്. കൂടാതെ, കപില തീർഥം, ഗോവിന്ദരാജ സ്വാമി ക്ഷേത്രം, ചന്ദ്രഗിരി കോട്ട എന്നിങ്ങനെ നിരവധി കാഴ്ചകളാണ് ഇവിടെ എത്തുന്ന സഞ്ചാരികളെ ആകർഷിക്കുന്നത്.
