പതിവു പോലെ ഉച്ചയൂണിന്റെ തിരക്കിലായിരുന്നു കാർത്ത്യായനി കൊച്ചിയിലെ ജീവനക്കാർ. പെട്ടെന്ന് ഊണ് കഴിക്കാൻ എത്തിയത് ഒരു പരിചിത മുഖം, തെലുങ്ക് സൂപ്പർതാരം മോഹൻ ബാബുവായിരുന്നു അത്. കൊച്ചിയിലെ പ്രശസ്ത ഹോട്ടലുകളിലൊന്നായ കാർത്ത്യായനിയിലെ മീൻ വിഭവങ്ങളുടെ രുചി പരീക്ഷിക്കാൻ എത്തിയതായിരുന്നു മോഹൻ ബാബു.
എരിവ് ഏറെ ഇഷ്ടപ്പെടുന്ന തെലുങ്ക് സൂപ്പർതാരം ഊണിന്റെ കൂടെ കാളാഞ്ചി മുളകിട്ടതും ടൈഗർ പ്രോൺസും മീൻ മുട്ടയുമാണ് കഴിച്ചത്. ഇതിൽ മീൻമുട്ട ആന്ധ്രയിൽ കിട്ടാൻ പ്രയാസമാണന്നും ഏറെ ഇഷ്ടപ്പെട്ടുവെന്നും പറഞ്ഞുവെന്നും ഇവിടുത്തെ മീൻവിഭവങ്ങളും ഊണും കഴിക്കാൻ വേണ്ടി മാത്രം കൊച്ചിയിൽ ഇനിയുമെത്തുമെന്ന് പറഞ്ഞിട്ടാണ് മടങ്ങിയത് എന്നുമാണ് കാർത്ത്യായനി കൊച്ചിയുടെ ഉടമ ജജീനാ വിനു മനോരമ ഓൺലൈനിനോട് പറഞ്ഞത്.
നേരത്തെ തെലുങ്ക് സൂപ്പർ താരം നാനിയും കൊച്ചിയിലെ കാർത്ത്യായനിയിലെ വിഭവങ്ങൾ പരീക്ഷിക്കാൻ എത്തിയിട്ടുണ്ട്. കൊച്ചിയിൽ വരുമ്പോഴെല്ലാം കാർത്ത്യായനിയിൽ എത്താറുണ്ടെന്നായിരുന്നു നാനി പറഞ്ഞത്. മോഹൻ ബാബു നിർമിക്കുന്ന പാൻ ഇന്ത്യൻ ചിത്രം കണ്ണപ്പയുടെ പ്രമോഷന്റെ ഭാഗമായിട്ടാണ് കൊച്ചിയിലെത്തിയത്.
തെലുങ്ക് നടനും മോഹൻബാബുവിന്റെ മകനുമായി വിഷ്ണു മഞ്ജു നായകനായെത്തുന്ന പുതിയ ചിത്രത്തിൽ മോഹൻലാൽ, പ്രഭാസ്, അക്ഷയ് കുമാർ, മുകേഷ് റിഷി, പ്രഭുദേവ, ശരത് കുമാർ തുടങ്ങി വൻ താരനിരയാണുള്ളത്. മോഹന്‍ ബാബുവിന്‍റെ ഉടമസ്ഥതയിലുള്ള 24 ഫ്രെയിംസ് ഫാക്‌ടറി, എ വി എ എന്‍റര്‍ടെയ്ന്‍മെന്റ്സ് എന്നീ ബാനറുകളിലാണ് ചിത്രം നിര്‍മിക്കുന്നത്.
