മലയാളികളുടെ പ്രിയതാരമാണ് പെപ്പെ എന്നറിയപ്പെടുന്ന ആന്റണി വർഗീസ്. കിടിലൻ ആക്ഷൻ രംഗങ്ങളിലൂടെ പ്രേക്ഷകരെ കീഴടക്കിയ താരം ഇപ്പോഴിതാ ദുൽഖർ സൽമാൻ നായകനാകുന്ന ചിത്രത്തിൽ പ്രധാന വേഷത്തിലെത്തുകയാണ്. നീണ്ട ഇടവേളയ്ക്കു ശേഷം ദുൽഖർ നായകനാകുന്ന മലയാള ചിത്രം ഐ ആം ഗെയ്മിലാണ് പെപ്പെ പ്രധാന കഥാപാത്രമാകുന്നത്. സിനിമയുടെ ചിത്രകരണ വേളയിൽ പെപ്പെ പങ്കുവച്ച ചിത്രമാണ് ഇപ്പോ സോഷ്യൽ മീഡിയയിൽ വൈറലായിരിക്കുന്നത്.
ഹൈദരബാദിലാണ് ഐ ആം ഗെയയിമിന്റെ ചിത്രീകരണം നടക്കുന്നത്. ഷൂട്ടിംഗിനിടെ തന്റെ കാരവാന് മുമ്പിൽ നിൽക്കുന്ന ചിത്രമാണ് നടൻ പങ്കുവച്ചിരിക്കുന്നത്. കാരവനിൽ എഴുതിയിരിക്കുന്ന പേരാണ് നെറ്റി സണസിന് കൗതുകമായത്. പെപ്പെ ഗാരു എന്നാണ് കാരവാനിൽ എഴുതിയിരിക്കുന്നത്. തെലുങ്കിൽ ആളുകളെ അഭിസംബോധന ചെയ്യുമ്പോൾ ബഹുമാനത്തോടെ പേരിനൊപ്പം ചേർക്കുന്നതാണ് ഗാരു എന്ന വാക്ക്.
പെപ്പെഗാരു എന്നഴുതിയ കാരവാനു മുന്നിൽ ചിരിച്ചുകൊണ്ടു നിൽക്കുന്ന ചിത്രം പങ്കുവച്ച് “നന്ദി എന്ന് ഹൃദയം പറയുന്നു. നന്ദി ഹൈദരാബാദ്”, എന്നാണ് കുറിച്ചിരിക്കുന്നത്. രസകരമായ കമന്റുകളുമായാണ് ആരാധകർ പോസ്റ്റിനോട് പ്രതികരിച്ചിരിക്കുന്നത്. ‘ഗാരു ടീമിലെ പുതിയ എൻട്രി. ദുൽഖർ ഗാരുവിനെ മിസ് ചെയ്യുന്നു’ എന്നുള്ള കമന്റുകൾ കാണാം.
ആർഡിഎക്സ് എന്ന സിനിമയിലൂടെ പ്രേക്ഷകരെ ത്രില്ലടിപ്പിച്ച നഹാസ് ഹിദായത്താണ് ഐ ആം ഗെയിം സംവിധാനം ചെയ്യുന്നത്. ബിഗ് ബജറ്റിൽ ഒരുങ്ങുന്ന ചിത്രം ഒരു മിസ്റ്ററി-ആക്ഷൻ-ഫാന്റസി ആയിരിക്കുമെന്നാണ് സൂചനകൾ. നഹാസ് ഹിദായത്തിന്റെ കഥയിൽ സജീർ ബാബ, ബിലാൽ മൊയ്തു, ഇസ്മായേൽ അബുബക്കർ എന്നിവരാണ് തിരക്കഥ.
ജിംഷി ഖാലിദ് ഛായാഗ്രഹണം നിർവഹിക്കുന്ന സിനിമയുടെ എഡിറ്റിംഗ് കൈകാര്യം ചെയ്യുന്നത് ചമൻ ചാക്കോ ആണ്. പ്രൊഡക്ഷൻ ഡിസൈനർ: അജയൻ ചാലിശ്ശേരി, മേക്കപ്പ്: റോണക്സ് സേവ്യർ, കോസ്റ്റ്യൂം: മഷർ ഹംസ, പ്രൊഡക്ഷൻ കൺട്രോളർ: ദീപക് പരമേശ്വരൻ, അസോസിയേറ്റ് ഡയറക്ടർ: രോഹിത് ചന്ദ്രശേഖർ , ഗാനരചന: മനു മഞ്ജിത്ത് -വിനായക് ശശികുമാർ.
