വാഷിംഗ്ടൺ ഡിസി: യുഎസ് വാക്സിൻ നയങ്ങളിൽ സമൂലമായ മാറ്റങ്ങൾ വരുത്തി ശ്രദ്ധേയനായ ഡോ. വിനയ് പ്രസാദ്, ഫുഡ് ആൻഡ് ഡ്രഗ് അഡ്മിനിസ്ട്രേഷനിൽ (FDA) നിന്ന് രാജിവച്ചു. ട്രംപ് ഭരണകൂടത്തിന് കീഴിൽ മൂന്നുമാസം മാത്രം നീണ്ട സേവനത്തിനൊടുവിലാണ് ഈ അപ്രതീക്ഷിത രാജി.
കോവിഡ്-19 വാക്സിൻ ബൂസ്റ്ററുകൾ സംബന്ധിച്ച FDAയുടെ നിലവിലെ നയങ്ങളിൽ കാര്യമായ മാറ്റങ്ങൾ വരുത്തിയ ഉദ്യോഗസ്ഥനാണ് പ്രസാദ്. 65 വയസ്സിന് മുകളിലുള്ളവർക്കും അതീവ അപകടസാധ്യതയുള്ളവർക്കും മാത്രം വാക്സിൻ ശുപാർശ ചെയ്യുന്ന നയം അദ്ദേഹത്തിന്റെ കീഴിലാണ് പ്രാബല്യത്തിൽ വന്നത്. ഇത് മുൻകാല മാർഗ്ഗനിർദ്ദേശങ്ങളിൽ നിന്നുള്ള വലിയ വ്യതിചലനമായിരുന്നു.
കുടുംബത്തോടൊപ്പം കൂടുതൽ സമയം ചെലവഴിക്കുന്നതിനായി കാലിഫോർണിയയിലേക്ക് മടങ്ങുകയാണെന്നാണ് വിശദീകരണം. അദ്ദേഹത്തിന്റെ “പ്രധാന പരിഷ്കാരങ്ങളെ” അധികൃതർ പ്രശംസിച്ചു. ഫെഡറൽ പാൻഡെമിക് നയങ്ങളുടെ ദീർഘകാല വിമർശകനായ പ്രസാദിനെ മേയ് മാസത്തിലാണ് FDAയുടെ സെന്റർ ഫോർ ബയോളജിക്സ് ഇവാലുവേഷൻ ആൻഡ് റിസർച്ചിന്റെ തലവനായി നിയമിച്ചത്. പിന്നീട് വാക്സിനുകൾ, ബയോളജിക്സ്, മെഡിക്കൽ സയൻസ് എന്നിവയുടെ മേൽനോട്ടത്തിനായി അദ്ദേഹത്തെ ചീഫ് മെഡിക്കൽ, സയന്റിഫിക് ഓഫീസറായും നിയമിച്ചു.
അദ്ദേഹത്തിന്റെ നിയമനം ഏജൻസിക്കുള്ളിലും പുറത്തും വലിയ ചർച്ചകൾക്ക് വഴിവെച്ചിരുന്നു. ആരോഗ്യവാന്മാരായ യുവാക്കൾക്ക് ആവർത്തിച്ചുള്ള വാക്സിനേഷൻ ആവശ്യമില്ലെന്ന് അദ്ദേഹം പരസ്യമായി വാദിച്ചിരുന്നു. കൂടാതെ, മോഡേണ, നോവാവാക്സ് എന്നിവയുടെ അപ്ഡേറ്റ് ചെയ്ത വാക്സിനുകളുടെ അടിയന്തര ഉപയോഗത്തിനുള്ള അനുമതി പരിമിതപ്പെടുത്താൻ പ്രസാദ് FDA ഉദ്യോഗസ്ഥരെ മറികടന്നുവെന്നും റിപ്പോർട്ടുകളുണ്ടായിരുന്നു.
പ്രസാദിന്റെ രാഷ്ട്രീയ നിലപാടുകളും വലതുപക്ഷ ആക്ടിവിസ്റ്റുകളുടെ വിമർശനത്തിന് ഇടയാക്കിയിരുന്നു. തെളിവ് അടിസ്ഥാനമാക്കിയുള്ള വൈദ്യശാസ്ത്രത്തിലെ അനാവശ്യ കാര്യങ്ങളെ വിമർശിക്കുന്നതിൽ പ്രസാദ് എന്നും മുൻപന്തിയിലായിരുന്നു.
പി പി ചെറിയാൻ
