പുതിയ സിനിമകള്‍ക്കെതിരെയുള്ള റിവ്യൂ ബോംബിങ് നിയമത്തിലൂടെ തടയാന്‍ സര്‍ക്കാര്‍. പണം കൈപ്പറ്റിയുള്ള റിവ്യൂകളും അവ പിന്‍വലിക്കുന്നതിന് പണം ആവശ്യപ്പെടുന്നതും കുറ്റകരമാക്കാനാണ് നീക്കം. സിനിമാനയത്തിന്റെ കരടിലാണ് ഇക്കാര്യം വ്യക്തമാക്കുന്നത്. വ്യാജ പതിപ്പും നിയമവിരുദ്ധ പ്രദര്‍ശനങ്ങളും തടയാനും ശക്തമായ നടപടികള്‍ ഉണ്ടാകും.
റിലീസ് ചെയ്ത് മണിക്കൂറുകള്‍ക്കുള്ളില്‍ റിവ്യൂ ബോംബിങ്ങിലൂടെ സിനിമകളെ തകര്‍ക്കലാണ് സമീപകാലത്ത് സിനിമാ വ്യവസായം നേരിടുന്ന വലിയ വെല്ലുവിളി. സിനിമാ നിരൂപണത്തിന് പണം നല്‍കാത്തവര്‍ക്കെതിരെ അനാവശ്യ വിമര്‍ശനം ഉയര്‍ത്തി തകര്‍ക്കുന്നതും പതിവാണ്. നിര്‍മ്മാതാക്കള്‍ക്കും സിനിമ പ്രവര്‍ത്തകര്‍ക്കും വലിയ തലവേദന ഉണ്ടാക്കുന്ന റിവ്യൂ ബോംബിങ് അവസാനിപ്പിക്കുമെന്ന് കരട് സിനിമ നയം പറയുന്നു.
റിവ്യൂ ബോബിങ് അനീതിയാണ്. പണം നല്‍കി പ്രചരിപ്പിക്കുന്ന റിവ്യൂകള്‍ ജനങ്ങളെ തെറ്റിദ്ധരിപ്പിക്കും. സുതാര്യമായ വിവരങ്ങള്‍ക്കുള്ള സിനിമാപ്രേമികളുടെ അവകാശവും ലംഘിക്കപ്പെടുകയാണ്. മോശം അവലോകനം ഒഴിവാക്കുന്നതിന് പണം ആവശ്യപ്പെടുന്നത് പണം തട്ടിയെടുക്കലാണ്. ഇതു തടയാന്‍ സര്‍ക്കാര്‍ പ്രതിജ്ഞാബദ്ധമാണെന്ന് കരട് സിനിമാനയം ചൂണ്ടിക്കാട്ടുന്നു. കുറ്റവാളിയെ ഉചിതമായ ഫോറത്തിനു മുമ്പാകെ ഹാജരാക്കി പരാതിക്ക് പരിഹാരം കാണുന്നതിന് സര്‍ക്കാര്‍ സൗകര്യമൊരക്കും. ഉയര്‍ന്ന നിലവാരം ഉറപ്പാക്കി ആധികാരികവും യഥാര്‍ത്ഥവുമായ വിവരങ്ങള്‍ നല്‍കുന്നതിന് ആലുകാലിക സംവിധാനം സര്‍ക്കാര്‍തലത്തില്‍ രൂപീകരിക്കുമെന്നും വാഗ്ദാനം ഉണ്ട്.
മുഖ്യധാരാ സിനിമകളെ പോലും റിവ്യൂ ബോബിങ്ങിലൂടെ നഷ്ടത്തിലേക്ക് തള്ളിയിടുന്നതിന് അറുതി വരുത്താനാണ് സര്‍ക്കാരിന്റെ ശ്രമം. സിനിമകളുടെ വ്യാജ പതിപ്പും നിയമവിരുദ്ധ പ്രദര്‍ശനവും തടയാനും നടപടികള്‍ ശക്തമാക്കും. പൊലീസിലെ ആന്റി പൈറസി സെല്‍ ശക്തിപ്പെടുത്തും. സമര്‍പ്പിത ഡാറ്റ കോറിഡോര്‍ വരുന്നതോടെ ഓണ്‍ലൈന്‍ വഴിയുള്ള ചോര്‍ച്ച തടയാനാകുമെന്നാണ് പ്രതീക്ഷ. ഭൗതിക സ്വത്തവകാശ നിയമത്തില്‍ നിയമവിരുദ്ധമായ സിനിമ പ്രദര്‍ശനവും ഉള്‍ക്കൊള്ളിക്കും. പബ്ലിക് ഡൊമൈനില്‍ നിന്ന് പൈറേറ്റഡ് ഉള്ളടക്കം നീക്കം ചെയ്യാന്‍ ഇന്റര്‍നെറ്റ് സേവന ദാതാക്കളുമായി സഹകരിക്കുമെന്നും കരട് സിനിമ നയത്തില്‍ സര്‍ക്കാര്‍ പറയുന്നു.
