മെറ്റബോളിക് ആരോഗ്യ രംഗത്തെ പുതിയ വെല്ലുവിളികളും, പ്രതിരോധ മാർഗങ്ങളും, ക്ഷേമത്തിനുള്ള പാതകളും ചർച്ച ചെയ്ത് ഏഴാമത് അമൃത ഇന്റർനാഷണൽ പബ്ലിക് ഹെൽത്ത് കോൺഫറൻസ് (AIPHC) 2025 അമൃത ആശുപത്രിയിൽ നടന്നു. കൊച്ചി അമൃത ആശുപത്രിയിലെ കമ്മ്യൂണിറ്റി മെഡിസിൻ, പബ്ലിക് ഹെൽത്ത്, എൻഡോക്രിനോളജി , ഗ്യാസ്ട്രോഎന്ററോളജി എന്നീ വിഭാഗങ്ങൾ ചേർന്നാണ് കോൺഫറൻസ് സംഘടിപ്പിച്ചത്. “മെറ്റബോളിക് ഹെൽത്ത് മാറ്റേഴ്സ്: പാത്ത്വേയ്സ് ടു പ്രിവൻഷൻ & വെൽനസ്” എന്നതായിരുന്നു ഈ വർഷത്തെ സമ്മേളനത്തിൻ്റെ പ്രമേയം.
കൊച്ചി സിറ്റി പോലീസ് കമ്മീഷണർ പുട്ട വിമലാദിത്യ ഐ.പി.എസ്. കോൺഫറൻസ് ഉദ്ഘാടനം ചെയ്തു. രണ്ട് ദിവസങ്ങളിലായി നടന്ന അന്താരാഷ്ട്ര സമ്മേളനത്തിൽ മാതാ അമൃതാനന്ദമയി മഠം ജനറൽ സെക്രട്ടറി സ്വാമി പൂർണാമൃതാനന്ദപുരി അനുഗ്രഹ പ്രഭാഷണം നടത്തി. അമൃത ഹോസ്പിറ്റൽസ് ഗ്രൂപ്പ് മെഡിക്കൽ ഡയറക്ടർ ഡോ.പ്രേം നായർ, അമൃത വിശ്വവിദ്യാപീഠം റിസർച്ച് ഡീൻ ഡോ. ഡി.എം. വാസുദേവൻ, അമൃത ആശുപത്രിയിലെ ഡോക്ടർമാരായ ഡോ. അശ്വതി.എസ്., ഡോ. കെ.ആർ.തങ്കപ്പൻ, ഡോ. ശോഭ ജോർജ്, ഡോ. പ്രിയ നായർ, ഡോ. നിഷ ഭവാനി, ഡോ. ശ്രീലക്ഷ്മി മോഹൻദാസ്, തുടങ്ങിയവർ പങ്കെടുത്തു.
ഗവേഷകർ, ക്ലിനിഷ്യൻസ്, പൊതുജനാരോഗ്യ വിദഗ്ദ്ധർ എന്നിവരുൾപ്പെടെ രാജ്യത്തിനകത്തും പുറത്തുമുള്ള 450 ഓളം പേരാണ് പങ്കെടുത്തത്. അമേരിക്ക, ഓസ്ട്രേലിയ, ഫിൻലൻഡ്, ശ്രീലങ്ക എന്നിവിടങ്ങളിൽ നിന്നുള്ള പ്രതിനിധികളുടെ പങ്കാളിത്തം AIPHC 2025-നെ ശ്രദ്ധേയമാക്കി.
കോൺഫറൻസിന്റെ വിവിധ സെഷനുകളിൽ പ്രിസിഷൻ മെഡിസിന് (കൃത്യതാ ചികിത്സ), നോൺ-കമ്മ്യൂണിക്കബിൾ ഡിസീസുകളിലേക്കുള്ള (NCD) സംയോജിത പ്രതിരോധ മാതൃകകൾ, മൾട്ടിമോർബിഡിറ്റി (ഒന്നിലധികം രോഗാവസ്ഥകൾ), ഡിജിറ്റൽ ആരോഗ്യ സംവിധാനങ്ങൾ, ബയോമാർക്കറുകൾ, അർബുദം നേരത്തേ കണ്ടെത്തൽ, അമിതവണ്ണവും ജീവിതശൈലീ ചികിത്സയും, പ്രമേഹ നിവാരണ പരിപാടികൾ, കൗമാരക്കാരുടെ മെറ്റബോളിക് ആരോഗ്യം തുടങ്ങിയ വിഷയങ്ങളിൽ വിദഗ്ധർ പ്രബന്ധങ്ങൾ അവതരിപ്പിച്ചു.
കോൺഫറൻസിന്റെ ഭാഗമായി സംഘടിപ്പിച്ച കോളാബറേറ്റീവ് മീറ്റ് വിവിധ സ്ഥാപനങ്ങളിൽ നിന്നുള്ള ഗവേഷകർക്കിടയിൽ ആശയവിനിമയവും ഗവേഷണ പങ്കാളിത്തവും വർദ്ധിപ്പിക്കുന്നതിനുള്ള വേദിയായി മാറി. ഓറൽ-പോസ്റ്റർ അവതരണങ്ങളും ഗവേഷണ ചർച്ചകളും യുവ ശാസ്ത്രജ്ഞരും പിജി വിദ്യാർത്ഥികളും സജീവമായി പങ്കുവെച്ചു.
പ്രമേഹ ഗവേഷണ രംഗത്തെ ആഗോള പ്രശസ്തനായ ഡോ. വി. മോഹൻ്റെ പ്രഭാഷണം സമ്മേളനത്തിൻ്റെ അക്കാദമിക് നിലവാരം വർദ്ധിപ്പിച്ചു. മറ്റ് ജനവിഭാഗങ്ങളെ അപേക്ഷിച്ച് ദക്ഷിണേഷ്യക്കാർക്ക് (South Asians) പ്രമേഹം വരാനുള്ള സാധ്യത ഗണ്യമായി കൂടുതലാണെന്ന് അദ്ദേഹം ചൂണ്ടിക്കാട്ടി. മെറ്റബോളിക് ആരോഗ്യം മെച്ചപ്പെടുത്തുന്നതിന് ജീവിതശൈലി പരിഷ്കരണം പ്രധാന പ്രതിരോധ മാർഗം ആണെന്നും പഴങ്ങളും പച്ചക്കറികളും കൂടുതലായി കഴിക്കാനും, അമിതമായ കാർബോഹൈഡ്രേറ്റ് ഉപഭോഗം കുറയ്ക്കാനും ഡോ. മോഹൻ ഊന്നിപ്പറഞ്ഞു.
