ക്യാൻസർ ചികിത്സയിൽ ഔഷധങ്ങളോളം തന്നെ പ്രാധാന്യമുള്ളതാണ് കൃത്യമായ പോഷകാഹാരം എന്ന സന്ദേശം ഉയർത്തിക്കൊണ്ട് കൊച്ചി അമൃത ആശുപത്രിയിൽ ലോക ക്യാൻസർ ദിനം ആചരിച്ചു. ‘യുണൈറ്റഡ് ബൈ യൂണീക്ക്’ എന്ന ആഗോള പ്രമേയത്തിൽ ഊന്നിക്കൊണ്ട് നടന്ന ദിനാഘോഷത്തിൻ്റെ ഭാഗമായി വാക്കത്തോണും, പ്രത്യേക പോഷകാഹാര കിറ്റുകളുടെ വിതരണവും നടന്നു. 100 സ്ത്രീകൾക്ക് സൗജന്യമായി മാമ്മോഗ്രാം ചെയ്യുന്നതിനുള്ള പദ്ധതി പ്രഖ്യാപനവും ഇതോടൊപ്പം നടന്നു.
ചികിത്സയ്ക്കിടെ ശരീരത്തിന് ആവശ്യമായ ഊർജ്ജവും പ്രതിരോധശേഷിയും നൽകുന്നതിൽ ഭക്ഷണത്തിനുള്ള പങ്കിനെക്കുറിച്ച് ബോധവൽക്കരണം നൽകുന്നതിനാണ് പോഷകാഹാര കിറ്റുകളുടെ വിതരണം നടത്തിയത്. ഇതോടൊപ്പം തന്നെ സംഘടിപ്പിച്ച പാചക മത്സരത്തിലെ വിജയികൾക്ക് സമ്മാന വിതരണവും നടന്നു. രോഗ പ്രതിരോധത്തിൽ ജീവിതശൈലിക്കുള്ള പ്രാധാന്യം വിളിച്ചോതുന്നതായിരുന്നു ഈ മത്സരം. ക്യാൻസർ ദിനാചരണത്തോടനുബന്ധിച്ച അമൃത ആശുപത്രിയിലെ ഡോക്ടർമാരും, ജീവനക്കാരും വിദ്യാർത്ഥികളും പങ്കെടുത്ത വാക്കത്തോൺ അമൃത ആശുപത്രി പരിസരത്തു നിന്നും ആരംഭിച്ച് ഇടപ്പള്ളി ചങ്ങമ്പുഴ പാർക്കിൽ അവസാനിച്ചു. തുടർന്ന് വിവിധ കലാ പരിപാടികളും നടന്നു.
ക്യാൻസർ ദിനാചരണ ചടങ്ങിൽ പ്രമുഖ സാഹിത്യകാരൻ ടി.ഡി. രാമകൃഷ്ണൻ, പ്രശസ്ത നാടക പ്രവർത്തക ആശാ ദേവി ടി.എസ്. എന്നിവർ മുഖ്യാതിഥികളായി പങ്കെടുത്തു. നാടക പ്രവർത്തക ആശാ ദേവി ഏകാംഗ നാടകം അവതരിപിച്ചു. രോഗാവസ്ഥയുടെ വേദനകളെ സർഗ്ഗാത്മകതയിലൂടെയും സാഹിത്യത്തിലൂടെയും എങ്ങനെ മറികടക്കാം എന്ന് അവർ പങ്കുവെച്ചു. കേവലം ആശുപത്രി മുറികൾക്കുള്ളിൽ ഒതുങ്ങേണ്ടതല്ല രോഗശാന്തി എന്നും, കലയും സാഹിത്യവും മനുഷ്യന്റെ മനസ്സിനെ സുഖപ്പെടുത്തുന്നതിൽ വലിയ പങ്ക് വഹിക്കുന്നുണ്ടെന്നും ടിഡി രാമകൃഷ്ണൻ പറഞ്ഞു. അമൃത ഹോസ്പിറ്റൽസ് ഗ്രൂപ്പ് മെഡിക്കൽ ഡയറക്ടർ ഡോ. പ്രേം നായർ ചടങ്ങിൽ അധ്യക്ഷത വഹിച്ചു.
രോഗികൾക്ക് വിദഗ്ദ്ധ ഡോക്ടർമാരുമായി നേരിട്ട് സംവദിക്കാൻ അവസരമൊരുക്കിയിരുന്നു. വിവിധ വിഭാഗങ്ങളിലെ ക്യാൻസർ വിദഗ്ദ്ധർ രോഗികളുടെയും ബന്ധുക്കളുടെയും സംശയങ്ങൾക്ക് മറുപടി നൽകി. ക്യാൻസർ രോഗ ബാധിതർക്കും അതിജീവിതർക്കും വേണ്ടി “അമൃത സ്നേഹം” എന്ന പേരിൽ പതിനഞ്ചോളം ഭാഷയിൽ തയ്യാറാക്കിയ ചോദ്യാവലിയുടെ പ്രകാശനം ഡോ. മാല മഥുർ ശർമ നിർവഹിച്ചു.ഡോ. പ്രതാപൻ നായർ, ഡോ. ബീന കെ.വി, ഡോ. വിജയകുമാർ ഡി.കെ, ഡോ. വെസ്ലി എം ജോസ്, ഡോ. അനൂപ് ആർ, ഡോ. നീതു. പി.കെ. തുടങ്ങിയവർ ചടങ്ങിൽ പങ്കെടുത്തു.
