വിഖ്യാത ഹോളിവുഡ് നടന് റോബര്ട്ട് ഡുവല് അന്തരിച്ചു. 95 വയസായിരുന്നു. വാര്ധക്യ സഹജമായ അസുഖങ്ങളെ തുടര്ന്ന് വിശ്രമ ജീവിതം നയിച്ചുവരികയായിരുന്നു. ഭാര്യ ലൂസിയാന ഡുവല് ആണ് മരണവിവരം സോഷ്യല്മീഡിയയിലൂടെ അറിയിച്ചത്.
ഹോളിവുഡിലെ ഏറ്റവും മികച്ച നടന്മാരിലൊരാളാണ് റോബര്ട്ട് ഡുവല്. അഭിനയത്തിലെ സ്വാഭാവികതകൊണ്ടും വൈവിധ്യമാര്ന്ന കഥാപാത്രങ്ങള്കൊണ്ടും അമ്പരപ്പിച്ച നടന്. ടെന്ഡര് മെഴ്സീസ് ചിത്രത്തിലെ അഭിനയത്തിന് മികച്ച നടനുള്ള ഓസ്കാര് നേടിയിരുന്നു. ആറ് തവണ മികച്ച നടനുള്ള ഓസ്കാറിനായി നാമനിര്ദേശം ചെയ്യപ്പെട്ടിട്ടുണ്ട്. നാല് തവണ ഗോള്ഡന് ഗ്ലോബ് പുരസ്കാരം നേടി.
‘ടു കില് എ മോക്കിംഗ് ബേര്ഡ്’ ആണ് ആദ്യ ചിത്രം. സിനിമയില് ബൂ റാഡ്ലി എന്ന കഥാപാത്രത്തെയാണ് റോബര്ട്ട് ഡുവല് അവതരിപ്പിച്ചത്. ‘ദി ഗോഡ്ഫാദര്’ സിനിമയിലെ ടോം ഹേഗന് എന്ന കഥാപാത്രവും ‘അപ്പോകാലിപ്സ് നൗ’വിലെ ലഫ്റ്റനന്റ് കേണല് ബില് കില്ഗോര് എന്ന കഥാപാത്രവും സിനിമാപ്രേമികള് മറക്കില്ല.
ആറ് പതിറ്റാണ്ട് നീണ്ട സിനിമാ ജീവിതത്തില് നടനെന്ന നിലയിലും സംവിധായകനായും വ്യക്തിമുദ്ര പതിപ്പിച്ച കലാകാരനായിരുന്നു ഡുവല്. അല്പാച്ചിനോ അടക്കമുള്ള പ്രമുഖര് നടന് അന്ത്യാഞ്ജലി അര്പ്പിച്ചു.
‘അപോകാലിപ്സ് നൗ’വില് വെറും പതിനഞ്ച് മിനുട്ടില് താഴെ മാത്രമായിരുന്നു ലഫ്റ്റനന്റ് കേണല് ബില് കില്ഗോര് എന്ന കഥാപാത്രമായി ഡുവല് എത്തിയത്. പക്ഷെ, ചുരുങ്ങിയ സമയത്തിനുള്ളില് സിനിമ മുഴുവന് അദ്ദേഹം തന്റേതാക്കി മാറ്റി.
ചിത്രത്തിലെ ‘I love the smell of napalm in the morning… It smells like victory’ എന്ന വിഖ്യാത ഡയലോഗും ഈ ചിത്രത്തിലേതാണ്. സിനിമയിലെ പ്രകടനത്തിന് മികച്ച സഹനടനുള്ള ഓസ്കാര് നോമിനേഷനും ഗോള്ഡന് ഗ്ലോബ് പുരസ്കാരവും ഡുവലിന് ലഭിച്ചിരുന്നു.
