അയൺ ചെയ്തുകൊണ്ടിരുന്നപ്പോൾ അബദ്ധത്തിൽ ഷർട്ട് കരിഞ്ഞുപോയാൽ നമ്മൾ എന്തുചെയ്യും? അത് പിന്നെ ഉപയോഗിക്കാൻ കൊള്ളില്ലെന്ന് കരുതി എടുത്തുകളയും അല്ലേ?. എന്നാൽ അങ്ങനെ എടുത്തുകളയാൻ വരട്ടെ! കാരണം, ഷർട്ടിലെ ആ കരിഞ്ഞ പാടാണ് ഇപ്പോൾ ഫാഷൻ ലോകത്തെ പുതിയ ട്രെൻഡ്. വെറുതെ പറഞ്ഞതല്ല, ഒരു ലക്ഷ്വറി ബ്രാൻഡാണ് ഈ കരിഞ്ഞ ഷർട്ട് വിപണിയിലിറക്കിയത്. വിലയോ, ഒരു ലക്ഷം രൂപ!
കാണുന്നവർക്ക് ഇതൊരു സാധാരണ വെള്ള ഷർട്ട്. നെഞ്ചിൻ്റെ ഭാഗത്ത് ഇസ്തിരിപ്പെട്ടി വെച്ച് കരിഞ്ഞതുപോലെയുള്ള ഒരു വലിയ പാട്, ആർക്കെങ്കിലും അബദ്ധം പറ്റിയതാണെന്ന് കരുതിയെങ്കിൽ തെറ്റി. ഇത് പ്രശസ്തമായ ‘വെറ്റ്മ’ എന്ന ലക്ഷ്വറി ബ്രാൻഡിൻ്റെ ഏറ്റവും പുതിയ ഫാഷൻ പരീക്ഷണമാണ്. ‘വൈറ്റ് അയണിംഗ് ബേൺ ഗ്രാഫിക് ഷർട്ട്’ എന്നാണ് ഇതിൻ്റെ പേര്.
ഏകദേശം 1,139 ഡോളറാണ് ഇതിൻ്റെ വില. അതായത് ഇന്ത്യൻ രൂപയിൽ ഒരു ലക്ഷം രൂപയ്ക്കും മുകളിൽ! ഗ്രാഫിക്സിലൂടെ ഉണ്ടാക്കിയെടുത്തതാണ് ഈ കരിഞ്ഞ പാട്. ഇതിനോടകം തന്നെ സോഷ്യൽ മീഡിയയിൽ ഈ ഷർട്ടിനെതിരെ ട്രോളുകളുടെ പൂരമാണ്. “എൻ്റെ അമ്മ ഇത് സൗജന്യമായി ഉണ്ടാക്കിത്തരും” എന്നാണ് ഒരാൾ കമൻ്റ് ചെയ്തത്.
ഇതാദ്യമായല്ല ഫാഷൻ ലോകം ഇത്തരം പരീക്ഷണങ്ങളുമായി എത്തുന്നത്. മുൻപ് കീറിയ ജീൻസുകളും, പഴകിയ സ്നീക്കറുകളും, മങ്ങിയ ജാക്കറ്റുകളുമെല്ലാം വൻ വിലയ്ക്ക് വിറ്റഴിക്കപ്പെട്ടിട്ടുണ്ട്. ഇതിനെ ഫാഷൻ എന്ന് വിളിക്കണോ അതോ മാർക്കറ്റിംഗ് സ്ട്രാറ്റജി എന്ന് വിളിക്കണോ എന്ന കാര്യത്തിൽ തർക്കം തുടരുകയാണ്. എന്തായാലും ഫാഷൻ പ്രേമികൾക്കിടയിൽ ഈ ‘കരിഞ്ഞ ഷർട്ട്’ ഇപ്പോൾ ഹിറ്റാണ്.
വെറ്റ്മ ബ്രാൻഡ് മുൻപോട്ട് വെച്ച സ്ട്രാറ്റജി എന്തായാലും വർക്ക് ഔട്ടായി. ഇതുപോലെ വിചിത്രമായി എന്തെങ്കിലും ഇറക്കിയാലാണ് ഇത്തരത്തിലുള്ള ബ്രാൻഡുകൾ ശ്രദ്ധ നേടുകയും വളരുകയും ചെയ്യുന്നത്. അപ്പോൾ എങ്ങനെയാ, ഫാഷൻ ഫോളോ ചെയ്യുകയല്ലേ?
