മിഥുൻ മാനുവൽ തോമസ് ഒരുക്കുന്ന എപ്പിക് ഫാന്റസി ചിത്രം ‘ആട് 3’യുടെ റിലീസിനായി ആവേശത്തോടെ കാത്തിരിക്കുകയാണ് ആരാധകർ. സിനിമയുടെ പോസ്റ്ററുകൾക്കും മറ്റ് അപ്ഡേറ്റുകൾക്കും വലിയ സ്വീകാര്യതയാണ് ലഭിച്ചത്. ഇതിനിടെ സിനിമയിൽ മമ്മൂട്ടിയുടെ അതിഥി വേഷമുണ്ടാകും എന്നൊരു അഭ്യൂഹം പരന്നിരുന്നു. ഇതിൽ വ്യക്തത വരുത്തിയിരിക്കുകയാണ് നിർമാതാവ് വിജയ് ബാബു.
“അങ്ങനെ ഞാനും കേട്ടിരുന്നു. സ്ക്രിപ്റ്റിൽ അങ്ങനെ ഒരു കഥാപാത്രമുണ്ട്. അവസാനത്തേക്കാണ് അത് ഷൂട്ട് ചെയ്യാൻ വച്ചിരുന്നത്. പ്രധാനപ്പെട്ട കഥാപാത്രമാണെങ്കിലും സ്ക്രീൻ സ്പേസ് കുറവാണ്. മമ്മൂട്ടി എന്ന ഇതിഹാസ നടനെ ‘ആട്’ എന്ന ചിത്രത്തിലേക്ക് കൊണ്ടുവരുമ്പോൾ അതിന് ഒരു ലോജിക്ക് വേണം. അദ്ദേഹത്തോട് ഈ കാര്യം അവതരിപ്പിക്കുമ്പോൾ വിശ്വാസയോഗ്യമായിരിക്കണം. പിന്നെ, ആ സമയത്താണ് മമ്മൂക്ക ചികിത്സയ്ക്ക് പോകുന്നത്. ‘പേട്രിയറ്റി’ന്റെ ഷൂട്ടിങ് കഴിഞ്ഞിട്ടുമില്ല. അതുകൊണ്ട് വേറെ പല പേരുകളും ആലോചിച്ചു. പിന്നെയാണ് ഞങ്ങൾ ആലോചിച്ചത് ‘ആട്’ എന്ന് പറയുമ്പോൾ ആളുകൾ വിചാരിക്കുന്നത് അതായിരിക്കില്ല. അപ്പോൾ ഞങ്ങൾ ഒരു ക്രിയേറ്റീവ് തീരുമാനം എടുത്തു. അതായിരിക്കും ഞങ്ങളുടെ പ്രധാന സർപ്രൈസ്,” എന്നാണ് വിജയ് ബാബുവിന്റെ വാക്കുകൾ.
‘ആട് ഒരു ഭീകര ജീവിയാണ്’, ‘ആട് 2’ എന്നീ ചിത്രങ്ങളുടെ തുടർച്ചയായാണ് ‘ആട് 3’ എത്തുന്നത്. ഫാന്റസി ഹ്യൂമർ ഴോണറിൽ അവതരിപ്പിക്കുന്ന ഈ ചിത്രം വൻ താരനിരയുടെ അകമ്പടിയോടെ, വലിയ മുതൽമുടക്കിലാണ് എത്തുന്നത്. ജയസൂര്യ (ഷാജി പാപ്പൻ), വിനായകൻ (ഡ്യൂഡ്) സണ്ണി വെയ്ൻ (സാത്താൻ സേവ്യർ), സൈജു കുറുപ്പ് (അറക്കൽ ബാപ്പു ), ഇന്ദ്രൻസ് (പി.പി. ശശി ), ധർമജൻ ബോൾഗാട്ടി (ക്യാപ്റ്റൻ ക്ലീറ്റസ് ), വിജയ് ബാബു (സർബത്ത് ഷബീർ) എന്നിവരാണ് സിനിമയിൽ പ്രധാന വേഷങ്ങളിൽ എത്തുന്നത്. ഇവർക്കൊപ്പം അലിയ ബോൺ എന്ന വിദേശ താരവും എത്തുന്നുണ്ട്.
സംഗീതം – ഷാൻ റഹ്മാൻ, ഛായാഗ്രഹണം – അഖിൽ ജോർജ്, എഡിറ്റിങ്- ലിജോ പോൾ, കലാസംവിധാനം – അനീസ് നാടോടി, മേക്കപ്പ് – റോണക്സ് സേവ്യർ, കോസ്റ്റ്യും ഡിസൈൻ – സ്റ്റെഫി സേവ്യർ, സ്റ്റിൽസ് – വിഷ്ണു എസ്. രാജൻ, പബ്ലിസിറ്റി ഡിസൈൻ – കൊളിൻസ്, എക്സിക്യൂട്ടീവ് പ്രൊഡ്യൂസർ – വിനയ് ബാബു, പ്രൊഡക്ഷൻ എക്സിക്യൂട്ടീവ് – ഷിബു പന്തല ക്കോട്, സെന്തിൽ പൂജപ്പുര, പ്രൊഡക്ഷൻ കൺട്രോളർ – ഷിബു ജി. സുശീലൻ.
