വിൻഡീസിൻ്റെ വൻ വിജയം തിരിച്ചടി; സെമിയിലെത്താനുള്ള ഇന്ത്യയുടെ സാധ്യതകൾ ഇങ്ങനെ..

തിങ്കളാഴ്ച മുംബൈയിൽ നടന്ന സൂപ്പർ 8 മത്സരത്തിൽ വെസ്റ്റ് ഇൻഡീസ് സിംബാബ്‌വെയ്‌ക്കെതിരെ 107 റൺസിൻ്റെ വമ്പൻ ജയം നേടിയതോടെ 2026 ടി20 ലോകകപ്പ് സെമി ഫൈനലിലെത്താനുള്ള ഇന്ത്യയുടെ സാധ്യതകൾക്ക് വീണ്ടും തിരിച്ചടി. ദക്ഷിണാഫ്രിക്കയ്‌ക്ക് എതിരായ തോൽവിക്ക് ശേഷം ഇന്ത്യൻ ടീമിൻ്റെ സാധ്യതകൾ കട്ടപ്പുറത്താണ്. നിലവിൽ ഗ്രൂപ്പ് ഒന്നിലുള്ള വെസ്റ്റ് ഇൻഡീസിൻ്റെ വിജയ മാർജിൻ അനുസരിച്ച് നെറ്റ് റൺറേറ്റ് ആരോഗ്യകരമായി നിലനിർത്താൻ ഇന്ത്യക്ക് ശേഷിക്കുന്ന മത്സരങ്ങളിൽ വലിയ മാർജിനിൽ ജയിക്കേണ്ടതുണ്ട്.

ഗ്രൂപ്പ് ഒന്നിൽ നാല് ടീമുകളും ഓരോ മത്സരം കളിച്ചപ്പോൾ നെറ്റ് റൺറേറ്റിൻ്റെ കരുത്തിൽ വിൻഡീസാണ് മുന്നിൽ. +5.350 ആണ് വിൻഡീസിൻ്റെ നെറ്റ് റൺറേറ്റ്. അതേസമയം, രണ്ടാം സ്ഥാനത്തുള്ള ദക്ഷിണാഫ്രിക്കയ്ക്ക് +3.800 ആണ് നെറ്റ് റൺറേറ്റ്. മൂന്നാം സ്ഥാനക്കാരായ ഇന്ത്യക്ക് നിലവിൽ -3.800 ആണ് നെറ്റ് റൺറേറ്റ്. സിംബാബ്‌വേക്ക് -5.350 എന്നിങ്ങനെയാണ് പോയിൻ്റ് പട്ടികയിലെ നില.

ബുധനാഴ്ച ചെന്നൈയിൽ വെച്ച് ഇന്ത്യയുടെ അടുത്ത മത്സരം സിംബാബ്‌വെയാണ്. അതേദിവസം തന്നെ, ഗ്രൂപ്പ് 1ലെ മറ്റൊരു സൂപ്പർ 8 മത്സരത്തിൽ, ദക്ഷിണാഫ്രിക്ക അഹമ്മദാബാദിൽ വച്ച് വെസ്റ്റ് ഇൻഡീസിനെ നേരിടും. ഇന്ത്യയുടെ സെമി ഫൈനൽ വിധി പ്രധാനമായും ഈ മത്സരത്തിൻ്റെ ഫലത്തെ ആശ്രയിച്ചിരിക്കും. ദക്ഷിണാഫ്രിക്ക വിജയിച്ചാൽ സെമിയിലേക്കുള്ള ഇന്ത്യയുടെ പാത എളുപ്പമാക്കും. മറിച്ചായാൽ നീലപ്പട പതറുമെന്നുറപ്പ്.

വെസ്റ്റ് ഇൻഡീസിനെതിരെയും സിംബാബ്‌വെയ്‌ക്കെതിരെയും ശേഷിക്കുന്ന രണ്ട് മത്സരങ്ങളും ഇന്ത്യ വിജയിച്ചാൽ, അവർക്ക് മൂന്ന് മത്സരങ്ങളിൽ നിന്ന് നാല് പോയിൻ്റുകൾ ലഭിക്കും. സൂപ്പർ 8ലെ മൂന്ന് മത്സരങ്ങളും ദക്ഷിണാഫ്രിക്ക വിജയിച്ചാൽ, ഇന്ത്യ സെമിഫൈനലിൽ അവരോടൊപ്പം ചേരും.

എന്നിരുന്നാലും, വെസ്റ്റ് ഇൻഡീസിനെതിരായ മത്സരത്തിൽ ദക്ഷിണാഫ്രിക്ക തോറ്റാൽ, ദക്ഷിണാഫ്രിക്ക, വെസ്റ്റ് ഇൻഡീസ്, ഇന്ത്യ എന്നീ മൂന്ന് ടീമുകൾക്കും 4 പോയിൻ്റുകൾ വീതമാകും. അതോടെ സെമി ഫൈനൽ ബർത്ത് നെറ്റ് റൺറേറ്റ് തീരുമാനിക്കും. ദക്ഷിണാഫ്രിക്ക അവരുടെ ശേഷിക്കുന്ന രണ്ട് മത്സരങ്ങളും തോറ്റാൽ ഇന്ത്യയും വെസ്റ്റ് ഇൻഡീസും സെമിയിലേക്ക് യോഗ്യത നേടും.

സെമി ഫൈനൽ പ്രതീക്ഷകൾ നിലനിർത്താൻ ഇന്ത്യ വെസ്റ്റ് ഇൻഡീസിനെതിരായ മത്സരം ജയിച്ചേ മതിയാകൂ. ദക്ഷിണാഫ്രിക്ക അവരുടെ ശേഷിക്കുന്ന രണ്ട് മത്സരങ്ങളിലും വിജയിക്കുകയും, ഇന്ത്യ വെസ്റ്റ് ഇൻഡീസിനെ തോൽപ്പിക്കുകയും എന്നാൽ സിംബാബ്‌വെയോട് തോൽക്കുകയും ചെയ്താൽ, ഇന്ത്യ, സിംബാബ്‌വെ, വെസ്റ്റ് ഇൻഡീസ് എന്നീ മൂന്ന് ടീമുകൾക്ക് രണ്ട് പോയിൻ്റുകൾ വീതം ലഭിക്കും. നെറ്റ് റൺറേറ്റ് അവരുടെ വിധി നിർണയിക്കും. എന്നിരുന്നാലും ദക്ഷിണാഫ്രിക്ക അവരുടെ ശേഷിക്കുന്ന രണ്ട് മത്സരങ്ങളിലും തോറ്റാൽ, സൂര്യകുമാർ യാദവ് നയിക്കുന്ന ടീമിന് യോഗ്യത നേടാനാവില്ല.

ഗ്രൂപ്പ് 1ലെ ശേഷിക്കുന്ന ടി20 ലോകകപ്പ് സൂപ്പർ 8 മത്സരങ്ങൾ

• ഫെബ്രുവരി 26: ദക്ഷിണാഫ്രിക്ക vs വെസ്റ്റ് ഇൻഡീസ് (അഹമ്മദാബാദ്)
• ഫെബ്രുവരി 26: ഇന്ത്യ vs സിംബാബ്‌വെ (ചെന്നൈ)
• മാർച്ച് 1: ദക്ഷിണാഫ്രിക്ക vs സിംബാബ്‌വേ (ഡൽഹി)
• മാർച്ച് 1: ഇന്ത്യ vs വെസ്റ്റ് ഇൻഡീസ് (കൊൽക്കത്ത)