നാഷണൽ സ്റ്റോക്ക് എക്സ്ചേഞ്ചും (എൻഎസ്ഇ) ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റ് കോഴിക്കോടും (ഐഐഎംകെ) സംയുക്തമായി മാക്രോ ഇക്കണോമിക്സ്, ബാങ്കിങ്, ഫിനാൻസ് എന്നീ വിഷയങ്ങളെ ആസ്പദമാക്കി മൂന്നാമത് വാർഷിക കോൺഫറൻസ് സംഘടിപ്പിച്ചു.
മുംബൈ ബി.കെ.സിയിലെ എൻഎസ്ഇ കോർപ്പറേറ്റ് ആസ്ഥാനത്ത് നടന്ന ചടങ്ങ് സെബി (SEBI) അംഗം അമർജീത് സിംഗ്, എൻഎസ്ഇ എംഡിയും സിഇഒയുമായ ആശിഷ് കുമാർ ചൗഹാൻ, ഐഐഎം കോഴിക്കോട് ഡയറക്ടർ പ്രൊഫ. ദേബാശിഷ് ചാറ്റർജി എന്നിവർ ചേർന്ന് ഉദ്ഘാടനം ചെയ്തു. ‘വിവരസാങ്കേതിക യുഗത്തിലെ വിവരങ്ങളുടെ അസമത്വം – വിപണിയും സമ്പദ്വ്യവസ്ഥയും ജനങ്ങളും’ എന്നതായിരുന്നു കോൺഫറൻസിന്റെ പ്രമേയം. വിപണിയും സാമ്പത്തിക രംഗവും നേരിടുന്ന വെല്ലുവിളികളെക്കുറിച്ച് സമ്മേളനത്തിൽ വിശദമായ ചർച്ചകൾ നടന്നു.
നയരൂപകർത്താക്കൾ, നിയന്ത്രണ ഏജൻസികൾ, ബാങ്കിങ് പ്രമുഖർ, വിപണി വിദഗ്ധർ എന്നിവർ സംവാദങ്ങളിൽ പങ്കെടുത്തു. സാമ്പത്തിക വിവരങ്ങൾ സുതാര്യവും സുരക്ഷിതവുമായി എല്ലാവർക്കും ഒരുപോലെ ലഭ്യമാകണമെന്ന് ആശിഷ് കുമാർ ചൗഹാൻ പറഞ്ഞു. വിപണിയിലെ വിവേചനങ്ങൾ ഒഴിവാക്കാനും നിക്ഷേപകരുടെ വിശ്വാസം ആർജിക്കാനും ദീർഘകാല നിക്ഷേപ വളർച്ച ഉറപ്പാക്കാനും ഇത് അത്യന്താപേക്ഷിതമാണെന്ന് അദ്ദേഹം കൂട്ടിച്ചേർത്തു.
