ജോലിത്തിരക്കുകയും മറ്റും കാരണവും വിശപ്പുവരാത്തതിനാലും രാത്രിയിലെ ക്രേവിങ്സ് നിയന്ത്രിക്കാനാകാത്തതിനാലും ഒക്കെയാണ് പലരും വളരെ വൈകി രാത്രി ഭക്ഷണം കഴിക്കുന്നത്. അത്താഴം രാത്രി 9 മണിക്കോ പത്ത് മണിക്കോ അതിലുമേറെ വൈകിയോ കഴിക്കുന്നവര് ഏറെയാണ്. അത്താഴം നേരത്തെ കഴിയ്ക്കണമെന്ന് പറഞ്ഞ് കേട്ടിട്ടുണ്ടെങ്കിലും എന്തുകൊണ്ടാണ് ഇത് പറയുന്നതെന്ന ശരിയായ ധാരണ പലര്ക്കുമില്ല. ലേറ്റായി അത്താഴം കഴിയ്ക്കുന്നത് വളരെ അപകടകരമെന്ന് പറയുന്നതിന്റെ കാരണങ്ങള് പരിശോധിക്കാം.
ശരീരത്തിനുമുണ്ടൊരു ക്ലോക്ക്
നമ്മുടെ ശരീരത്തിന്റെ സമയതാളങ്ങളും പ്രവര്ത്തനങ്ങളും സിര്കാഡിയന് റിതം എന്നതിലൂടെയാണ് നിയന്ത്രിക്കപ്പെടുന്നത്. നമ്മുടെ ഉറക്കത്തിന്റേയും ഉണര്ച്ചയുടേയും താളമെല്ലാം ഇതുമൂലമാണ് നിയന്ത്രിക്കപ്പെടുന്നത്. ഇതിലുണ്ടാകുന്ന താളപ്പിഴകള് അമിത വണ്ണം ഉള്പ്പെടെയുള്ള പലവിധ പ്രശ്നങ്ങളിലേക്കും രോഗങ്ങളിലേക്കുമുള്ള വഴിവെട്ടുന്നുണ്ട്. വളരെ വൈകി ഭക്ഷണം കഴിക്കുന്നതും വളരെ വൈകി ഉറങ്ങുന്നതും ഈ സിര്കാഡിയന് റിതത്തെ ദോഷകരമായി ബാധിക്കും.
മെറ്റബോളിസം
നമ്മള് വിചാരിക്കുന്നതിലും വലിയ ആഘാതമാണ് വൈകിയുള്ള അത്താഴം നമ്മുടെ മെറ്റബോളിസത്തില് ഏല്പ്പിക്കുന്നത്. വൈകി ഭക്ഷണം കഴിയ്ക്കുന്നത് രക്തത്തിലെ പഞ്ചസാരയുടെ അളവില് ഉള്പ്പെടെ മാറ്റങ്ങള് വരുത്തുമെന്ന് പുതിയ പഠനങ്ങള് പറയുന്നു. മെറ്റബോളിസം സാരമായി ബാധിക്കപ്പെടുന്നതിനാല് തന്നെ സാധാരണ ഉറക്കത്തിന്റെ സമയത്ത് നടക്കുന്നതിനേക്കാള് കുറഞ്ഞ ഫാറ്റ് മെറ്റബോളിസം മാത്രമേ വൈകി അത്താഴം കഴിയ്ക്കുന്നവരില് നടക്കുന്നുള്ളൂ. ഇത് കാലക്രമത്തില് കുടവയറുണ്ടാക്കാന് കാരണമാകുന്നു.
