പറ, പറ, പറ, പറ
നെല്ല് അളക്കുന്ന പറ അല്ല ,
നിങ്ങൾ പറയുന്ന “പറ” തന്നെയാണ്
ഞാൻ പറയാൻ പോകുന്ന പറ.
പക്ഷെ പറഞ്ഞാലും പറഞ്ഞാലും
അവനു മനസിലാകുന്നത് വേറെയാണ് .
പലവട്ടം പല രീതിയിൽ പറഞ്ഞു നോക്കി
ഒടുവിൽ മനസിലായി ഫലമില്ലെന്നു.
അവസാനം കിതച്ചും വിതുമ്പിയും പറയാനുള്ളത് പറഞ്ഞപ്പോൾ
അവൻ പറഞ്ഞു : “എന്റെ രക്തസമ്മർദ്ദം ഉയരുന്നു” !
അപ്പോൾ ഞാൻ പറച്ചിൽ നിർത്തി
കാരണം പറഞ്ഞിട്ടും ഫലമില്ലെന്നു മനസിലായി.
എന്നിട്ടും അവൻ പിന്നെയും പറയുന്നു :
“പറ, പറ, പറ, പറ………”
ഞാൻ കേൾക്കട്ടെ.
ഇനി എന്ത് പറയും ?
മൗനമായി ഞാൻ
ചങ്കെടുത്തു കാണിച്ചാലും ചെമ്പരത്തി പൂവ് !
കവിത: ലാലി ജോസഫ്
