സ്പൈഡര്മാനും സൂപ്പര്മാനുമൊക്കെ മുമ്പ് ഇന്ത്യയിലെ കുട്ടികള്ക്ക് ഒരു സൂപ്പര്ഹീറോ ഉണ്ടായിരുന്നു, 90 സ് കിഡ്സിന്റെ സ്വന്തം ശക്തിമാന്. മുകേഷ് ഖന്ന അവതരിപ്പിച്ച ശക്തിമാന് എന്ന സൂപ്പര് ഹീറോ സീരിയല് കാണാന് മറ്റെല്ലാം മാറ്റിവെച്ച് കാത്തിരുന്ന കുട്ടികളാണ് ഇന്നത്തെ യുവാക്കള്.
90 സ് കിഡ്സിന്റെ നൊസ്റ്റാള്ജിയയായ ശക്തിമാന് സിനിമയാകുന്നുവെന്ന വാര്ത്ത കേള്ക്കാന് തുടങ്ങിയിട്ട് കുറച്ചു വര്ഷമായി. റണ്വീര് സിങ് ശക്തിമാനായി എത്തുന്നുവെന്നായിരുന്നു വാര്ത്തകള്. ഈ സിനിമയില് മലയാളികളുടെ സ്വന്തം ബേസില് ജോസഫും പ്രധാന വേഷത്തിലെത്തുന്നുവെന്ന് റിപ്പോര്ട്ടുകളുണ്ട്.
എന്നാല്, സിനിമയെ കുറിച്ചുള്ള പുതിയ അപ്ഡേഷനൊന്നും അടുത്തിടെ കേള്ക്കാനില്ല. ഇതിനിടയിലാണ് സിനിമയെ കുറിച്ചുള്ള തന്റെ നിലപാട് വ്യക്തമാക്കി സാക്ഷാല് OG ശക്തിമാന് മുകേഷ് ഖന്ന രംഗത്തെത്തിയത്. സിനിമ പ്രഖ്യാപിച്ച സമയം മുതല് മുകേഷ് ഖന്ന സ്വന്തം അഭിപ്രായവ്യത്യാസങ്ങള് തുറന്നു പറഞ്ഞിരുന്നു. ഇതിനെ കുറിച്ച് വീണ്ടും തന്റെ നിലപാട് വ്യക്തമാക്കിയിരിക്കുകയാണ് അദ്ദേഹം.
ശക്തിമാന്റെ ബൗദ്ധിക പകര്പ്പവകാശം ഇപ്പോഴും തനിക്ക് തന്നെയാണെന്ന് മുകേഷ് ഖന്ന പറയുന്നു. ശക്തിമാന് സിനിമയാക്കാനായി ഏഴ് വര്ഷത്തേക്കുള്ള അവകാശം അണിയറ പ്രവര്ത്തകര്ക്ക് നല്കിയിരുന്നു. ശക്തിമാന്റെ മൂല്യങ്ങള് ചോര്ത്തരുത് എന്നാണ് അവകാശം നല്കുമ്പോള് താന് ആവശ്യപ്പെട്ടതെന്നും ഗലാട്ട ഇന്ത്യക്ക് നല്കിയ അഭിമുഖത്തില് മുകേഷ് ഖന്ന പറഞ്ഞു.
ഡിസ്കോയില് നൃത്തം ചെയ്യുന്ന ശക്തിമാനെ ഒരിക്കലും തനിക്ക് അംഗീകരിക്കാന് കഴിയില്ലെന്നും മുകേഷ് ഖന്ന പറയുന്നു. പക്ഷെ, ഇതിനെ കുറിച്ച് വാക്കാലുള്ള ഉറപ്പ് മാത്രമേ തനിക്ക് ലഭിച്ചിട്ടുള്ളൂ. മാത്രമല്ല, ശക്തിമാനായി റണ്വീര് സിങ് എത്തുന്നതിലും മുകേഷ് ഖന്നയ്ക്ക് മതിപ്പില്ല.
ശക്തിമാന് എന്ന സൂപ്പര് ഹീറോ ആകാന് റണ്വീര് സിങ്ങിന് പൂര്ണമായി കഴിയുമോ എന്നതില് സംശയം പ്രകടിപ്പിക്കുകയാണ് അദ്ദേഹം. നേരത്തേയും റണ്വീര് സിങ് ശക്തിമാനാകുന്നതില് മുകേഷ് ഖന്ന അതൃപ്തി തുറന്നു പറഞ്ഞിരുന്നു.
എന്നാല്, കഥാപാത്രത്തിനു വേണ്ടി റണ്വീര് സിങ് തന്നെ നേരിട്ടു വന്നു കണ്ട് സംസാരിച്ചിരുന്നതായും അദ്ദേഹം പറയുന്നു. മൂന്ന് മണിക്കൂറോളം റണ്വീര് സിങ് തന്റെ ഓഫീസില് ചെലവഴിച്ചു. ശക്തിമാനില് അദ്ദേഹത്തിന് വലിയ താത്പര്യമുണ്ടായിരുന്നു. തന്നെ വിശ്വസിപ്പിക്കാനായി അദ്ദേഹം മണിക്കൂറുകളോളം സംസാരിച്ചു- പക്ഷെ, ശക്തിമാന് ആകാന് അദ്ദേഹത്തിന് ഒരിക്കലും കഴിയില്ലെന്ന് തനിക്ക് തുടക്കം മുതല് അറിയാമായിരുന്നു എന്നാണ് മുകേഷ് ഖന്ന മുന്നെ പറഞ്ഞത്.
എന്നാല്, ആ കൂടിക്കാഴ്ചയ്ക്കു ശേഷം റണ്വീര് സിങ് ശക്തിമാന് ആകുമെന്നും താന് അനുമതി നല്കിയെന്നുമായിരുന്നു വാര്ത്തകള് വന്നത്. പക്ഷെ അത് സത്യമല്ല. റണ്വീര് സിങ് മികച്ച നടനാണെന്ന് മാത്രമാണ് താന് പറഞ്ഞത്. അദ്ദേഹം ശക്തിമാന് ആകും എന്ന് ഒരിക്കലും താന് പറഞ്ഞിട്ടില്ലെന്നും മുകേഷ് ഖന്ന വ്യക്തമാക്കി.
ശക്തിമാന് വേണ്ടി നിയമ പോരാട്ടത്തിനു പോലും ഒരുക്കമാണെന്ന നിലപാടിലാണ് താനെന്നും അഭിമുഖത്തില് മുകേഷ് ഖന്ന പറയുന്നുണ്ട്.
