ഇറാനിലുള്ള തങ്ങളുടെ പൗരന്മാർ ഉടൻ രാജ്യം വിടണമെന്ന് അമേരിക്കയുടെ മുന്നറിയിപ്പ്.യുഎസ് സർക്കാരിൻ്റെ സഹായത്തിന് കാത്തുനിൽക്കാതെ രാജ്യം വിടാനാണ് ഇറാനിലെ വെർച്വൽ യുഎസ് എംബസി യുഎസ് പൗരന്മാരോട് ആവശ്യപ്പെട്ടത്.
ഡിസംബർ അവസാനത്തോടെ ആരംഭിച്ച വമ്പിച്ച പ്രതിഷേധ പ്രക്ഷോഭങ്ങൾക്കെതിരെ ഇറാൻ്റെ രക്തരൂക്ഷിതമായ അടിച്ചമർത്തലിന് മറുപടിയായി യുഎസ് പ്രസിഡന്റ് ഡൊണാൾഡ് ട്രംപ് ഇറാനെ ആക്രമിക്കുമെന്ന് ഭീഷണിപ്പെടുത്തിയിരുന്നു. ഇതിനെ തുടർന്ന് ഇറാനുമായുള്ള സംഘർഷം രൂക്ഷമായ സാഹചര്യത്തിലാണ് പൗരന്മാരോട് തിരിച്ചു വരാൻ ട്രംപ് ആവശ്യപ്പെട്ടിരിക്കുന്നത്.
യുദ്ധകപ്പലുകൾ ഉൾപ്പെടെയുള്ള അമേരിക്കൻ സൈനികവ്യൂഹം നിലവിൽ ഗൾഫ് മേഖലയിൽ തുടരുകയാണ്. തുടർച്ചയായി ഇൻ്റർനെറ്റ് തടസങ്ങൾ പ്രതീക്ഷിക്കണമെന്നും അതിനാൽ യുഎസ് പൗരന്മാർ ആശയവിനിമയത്തിനുള്ള ബദൽ മാർഗങ്ങൾ ആസൂത്രണം ചെയ്യണമെന്നും സുരക്ഷിതമാണെങ്കിൽ, ഇറാനിൽ നിന്ന് കരമാർഗം അർമേനിയയിലേക്കോ തുർക്കിയിലേക്കോ പോകുന്നത് പരിഗണിക്കണമെന്നും മുന്നറിയിപ്പിൽ പറയുന്നു.
വിമാനങ്ങൾ എപ്പോൾ വേണമെങ്കിലും റദ്ദാക്കാം എന്നുള്ളതിനാൽ അപ്ഡേറ്റുകൾക്കായി എയർലൈനുകളുമായി നേരിട്ട് പരിശോധിക്കണം. എവിടേക്കും പോകാൻ കഴിയുന്നില്ലെങ്കിൽ താമസസ്ഥലത്തോ സുരക്ഷിതമായൊരു കെട്ടിടത്തിലോ സുരക്ഷിതമായ ഒരു സ്ഥലം കണ്ടെത്തുക. ഭക്ഷണം, വെള്ളം, മരുന്നുകൾ, മറ്റ് അവശ്യ വസ്തുക്കൾ എന്നിവ കരുതുക. ചുറ്റുപാടുകളെക്കുറിച്ച് ബോധവാന്മാരായിരിക്കുവാനും നിർദേശം നൽകിയിട്ടുണ്ട്.
ഫോണുകൾ ചാർജ് ചെയ്ത് സൂക്ഷിക്കണമെന്നും ഇറാനിലെ സുരക്ഷയെക്കുറിച്ചുള്ള ഏറ്റവും പുതിയ അപ്ഡേറ്റുകൾ ലഭിക്കുന്നതിന് സ്മാർട്ട് ട്രാവലർ എൻറോൾമെൻ്റ് പ്രോഗ്രാമിൽ ചേരണമെന്നും നിർദേശിച്ചിട്ടുണ്ട്. ഇരട്ട പൗരത്വം ഉള്ളവരോട് ഇറാനിയൻ പാസ്പോർട്ടുകൾ ഉപയോഗിച്ച് ഇറാനിൽ നിന്ന് പുറത്തുകടക്കാനും യുഎസ് നിർദേശം നൽകിയിട്ടുണ്ട്.
സാധുവായ യുഎസ് പാസ്പോർട്ട് കൈവശം ഇല്ലാത്ത യുഎസ് പൗരന്മാർ ഇറാനിൽ നിന്ന് പോയതിനുശേഷം അടുത്തുള്ള യുഎസ് എംബസിയിലോ കോൺസുലേറ്റിലോ അപേക്ഷിക്കണമെന്നും നിർദേശത്തിലുണ്ട്.അതിർത്തികൾ വിട്ടുപോകാൻ തീരുമാനിച്ചാൽ യുഎസ് സർക്കാരിന് പൗരന്മാരുടെ സുരക്ഷ ഉറപ്പ് നൽകാൻ കഴിയില്ലെന്നും വാഷിംഗ്ടൺ മുന്നറിയിപ്പ് നൽകി.
