മെക്സിക്കോയ്ക്കും കാനഡയ്ക്കുമൊപ്പം യുഎസും കൂടി ആതിഥേയത്വം വഹിക്കുന്ന ഫിഫ ലോകകപ്പില് പങ്കെടുക്കാനാകില്ലെന്ന് ഇറാന് വ്യക്തമാക്കിയതോടെ യുദ്ധത്തിന്റെ കെടുതി കായികലോകത്തേക്കും നീങ്ങുകയാണ്.
ഡൊണാള്ഡ് ട്രംപിന്റെ ഭരണകൂടം തങ്ങളുടെ നേതാവിനെ കൊലപ്പെടുത്തിയതിനാല് ഒരു സാഹചര്യത്തിലും ലോകകപ്പില് പങ്കെടുക്കില്ലെന്നാണ് ഇറാന്റെ കായിക മന്ത്രി അഹമ്മദ് ഡോണ്യമാലി കഴിഞ്ഞ ദിവസം വ്യക്തമാക്കിയത്.
ദിവസങ്ങള്ക്കു മുമ്പ് ഇറാന് ഫുട്ബോള് ഫെഡറേഷന് പ്രസിഡന്റ് മെഹ്ദി താജും ഇതേ കാര്യം തന്നെയായിരുന്നു പറഞ്ഞത്. ഇതോടെ, ഇറാന് ഫിഫ ലോകകപ്പില് പങ്കാളികളാകില്ലെന്ന് ഏതാണ്ട് ഉറപ്പായിരിക്കുകയാണ്.
ലോകകപ്പില് ഇറാന് പങ്കെടുത്തില്ലെങ്കില് എന്തു സംഭവിക്കും?
നിലവില് ഗ്രൂപ്പ് ജിയില് ഉള്ള ഇറാന്റെ ആദ്യ എതിരാളികള് ന്യൂസിലന്ഡും ബെല്ജിയവുമാണ്. കാലിഫോര്ണിയയിലാണ് ഈ രണ്ട് മത്സരങ്ങളും നിശ്ചയിച്ചിരിക്കുന്നത്. സിയാറ്റിലില് ഈജിപ്താണ് ഗ്രൂപ്പ് മത്സരത്തിലെ അവസാന എതിരാളികള്.
ഇറാന് ടൂര്ണമെന്റില് നിന്ന് പിന്മാറിയാല് ഫിഫ ലോകകകപ്പ് റെഗുലേഷന്റെ ആര്ട്ടിക്കിള് 6 പ്രകാരമായിരിക്കും തുടര് നടപടികള്. ടൂര്ണമെന്റിന് 30 ദിവസം മുമ്പാണ് ഒരു ടീം പിന്മാറുന്നതെങ്കില് 250,000 സ്വിസ് ഫ്രാങ്ക്സ് (ഏകദേശം 2.96 കോടി രൂപ) പിഴ നല്കേണ്ടി വരും.
ടൂര്ണമെന്റ് തുടങ്ങാന് 30 ദിവസത്തില് താഴെ മാത്രം ബാക്കിയുള്ളപ്പോഴാണ് പിന്മാറ്റമെങ്കില് പിഴത്തുക ഇരട്ടിയാകും. അതായത് കുറഞ്ഞത് 5,00,000 സ്വിസ് ഫ്രാങ്ക് (ഏകദേശം 5.92 കോടി രൂപ) പിഴയായി ഈടാക്കും. കൂടാതെ പിന്മാറുന്ന ടീമുകള് ഫിഫയില് നിന്ന് സ്വീകരിച്ച സാമ്പത്തിക സഹായമോ തിരികെ നല്കണം.
ടൂര്ണമെന്റ് തുടങ്ങിയതിനു ശേഷം പിന്മാറിയാല് എന്തു സംഭവിക്കും?
ലോകകപ്പ് തുടങ്ങിയതിനു ശേഷം ഒരു ടീം പിന്മാറിയാല് വലിയ നടപടികളാകും ഫിഫയുടെ ഭാഗത്തു നിന്നും ഉണ്ടാകുക. ഫിഫയുടെ ഭാവി മത്സരങ്ങളില് നിന്നടക്കം വിലക്ക് നേരിടേണ്ടി വരും. പിന്മാറിയ ടീമിനു പകരം മറ്റൊരു ടീമിനെ ടൂര്ണമെന്റില് ഉള്പ്പെടുത്തുകയും ചെയ്യും. ഫിഫയ്ക്കുണ്ടാകുന്ന നഷ്ടത്തിന് നഷ്ടപരിഹാരവും നല്കേണ്ടി വരും.
ഇറാന് പിന്മാറിയാല് പകരം ആരാകും?
ലോകകപ്പില് നിന്ന് ഇറാന് പിന്മാറിയാല് ഫിഫയുടെ റെഗുലേഷന് 6.7 പ്രകാരം ഒരു ടീം പിന്മാറിയാല് മറ്റൊരു ടീമിനെ ഉള്പ്പെടുത്തണോ അതോ ആ ഗ്രൂപ്പിലെ ടീമുകളുടെ എണ്ണം കുറയ്ക്കണോ എന്ന് ഫിഫയ്ക്ക് തീരുമാനിക്കാം.
സാധ്യതയുള്ള ടീമുകള്
ഇറാഖ്: ഏറ്റവും കൂടുതല് സാധ്യത കല്പ്പിക്കപ്പെടുന്നത് ഇറാഖിനാണ്. ഏഷ്യന് യോഗ്യതാ റൗണ്ടിലെ പ്രകടനം അനുസരിച്ച് ഇറാഖ് നിലവില് ഇന്റര്കോണ്ടിനെന്റല് പ്ലേ ഓഫ് കളിക്കാന് യോഗ്യത നേടിയിട്ടുണ്ട്. ഇറാന് പിന്മാറിയാല് ഇറാഖിന് നേരിട്ട് ലോകകപ്പിലേക്ക് പ്രവേശനം ലഭിച്ചേക്കാം.
യുഎഇ: ഇറാഖിന് നേരിട്ട് പ്രവേശനം നല്കുകയാണെങ്കില്, ഇറാഖ് കളിക്കേണ്ടിയിരുന്ന പ്ലേ ഓഫ് സ്ഥാനത്തേക്ക് യുഎഇക്ക് അവസരം ലഭിച്ചേക്കാം. ഏഷ്യന് ക്വാളിഫയറില് ഇറാഖിനോട് പരാജയപ്പെട്ട ടീമാണ് യുഎഇ.
ഇറ്റലി: ചില റിപ്പോര്ട്ടുകള് പ്രകാരം, ഏഷ്യന് ടീമിന് പകരം ലോക റാങ്കിംഗില് മുന്നിലുള്ളതും എന്നാല് യോഗ്യത നേടാന് കഴിയാത്തതുമായ ഇറ്റലിയെപ്പോലുള്ള വലിയ ടീമുകളെ ഉള്പ്പെടുത്താനും ഫിഫ ആലോചിച്ചേക്കാം.
