വാഷിംഗ്ടൺ ഡി.സി.: 2025 സെപ്റ്റംബർ 2 മുതൽ പ്രാബല്യത്തിൽ വരുന്ന രീതിയിൽ യു.എസ്. സ്റ്റേറ്റ് ഡിപ്പാർട്ട്‌മെന്റ് (DOS) വിസ അഭിമുഖ ഇളവ് നയങ്ങളിൽ കാര്യമായ മാറ്റങ്ങൾ പ്രഖ്യാപിച്ചു. ഇതനുസരിച്ച് മിക്ക വിസ അപേക്ഷകർക്കും ഇനി അഭിമുഖ ഇളവ് ലഭ്യമല്ല.
പുതിയ മാർഗ്ഗനിർദ്ദേശങ്ങൾ പ്രകാരം E-1, E-2, F-1, H-1B, J-1, L-1, O-1 തുടങ്ങിയ മിക്ക വിസ വിഭാഗങ്ങൾക്കും നേരിട്ടുള്ള അഭിമുഖം നിർബന്ധമാക്കും. വിസ പുതുക്കുന്നവർക്കും ആവർത്തിച്ചുള്ള അപേക്ഷകർക്കും പോലും അഭിമുഖ ഇളവ് ലഭിക്കില്ല. കൂടാതെ, 14 വയസ്സിൽ താഴെയുള്ളവരും 79 വയസ്സിൽ കൂടുതൽ പ്രായമുള്ളവരും ഇനി നേരിട്ടുള്ള അഭിമുഖത്തിന് ഹാജരാകേണ്ടി വരും.
ഇളവുകൾ ലഭിക്കുന്ന വിസകൾ:
പൂർണ്ണ സാധുതയുള്ള B-1, B-2, B1/B2 വിസ അല്ലെങ്കിൽ ബോർഡർ ക്രോസിംഗ് കാർഡ്/ഫോയിൽ പുതുക്കുന്ന ചില അപേക്ഷകർക്ക് മാത്രമാണ് ഇനി അഭിമുഖ ഇളവുകൾക്ക് അർഹതയുള്ളത്. ഇതിന് മുൻ വിസയുടെ കാലാവധി കഴിഞ്ഞ് 12 മാസത്തിനുള്ളിൽ അപേക്ഷിക്കുകയും, മുൻ വിസ ലഭിക്കുമ്പോൾ കുറഞ്ഞത് 18 വയസ്സ് പ്രായം ഉണ്ടായിരിക്കുകയും, സ്വന്തം രാജ്യത്ത് നിന്ന് അപേക്ഷിക്കുകയും, വിസ നിരസിക്കപ്പെടാതിരിക്കുകയും വേണം.
A-1, A-2, C-3, G-1, G-2, G-3, G-4, NATO-1 മുതൽ NATO-6, അല്ലെങ്കിൽ TECRO E-1 എന്നീ നയതന്ത്ര അല്ലെങ്കിൽ ഔദ്യോഗിക വിസകൾക്ക് അഭിമുഖ ഇളവ് തുടരും.
പുതിയ മാറ്റങ്ങൾ കാരണം വിസ അപ്പോയിന്റ്‌മെന്റുകൾക്കും പ്രോസസ്സിംഗിനും കാലതാമസം ഉണ്ടാകാൻ സാധ്യതയുണ്ടെന്നും, അപേക്ഷകർ അതത് എംബസി, കോൺസുലേറ്റ് വെബ്സൈറ്റുകൾ സന്ദർശിച്ച് കൂടുതൽ വിവരങ്ങൾ മനസ്സിലാക്കണമെന്നും അധികൃതർ അറിയിച്ചു.
പി പി ചെറിയാൻ
